Mostrando entradas con la etiqueta soidade. Mostrar todas las entradas
Mostrando entradas con la etiqueta soidade. Mostrar todas las entradas

lunes, 30 de abril de 2018

El camino de Olaj


                                              

León Barreto, Martín, El camino de Olaj, ilustr. Martín León Barreto, Pontevedra: Editorial Kalandraka, 2011, [48 pp.], (ISBN 978-84-84647-68-3).



Breve descrición do formato e contido. Estamos ante un álbum ilustrado do autor Martín León Barreto, de orixe uruguaia, editado no ano 2011. O autor é especialista no deseño de coleccións e portadas de libros infantís e xuvenís. Recibiu o IV Premio Internacional Compostela de Álbum Ilustrado no ano 2011 e o The White Ravens (Alemaña) no 2012. Este último premio está organizado pola Internationale Jugendbibliothek (International Youth Library), que elabora un catálogo de máis de 200 títulos infantís e xuvenís destacados pola súa temática, innovación artística, deseño, estilo literario etc. O presente conto componse de 48 páxinas e está recomendado para nenos/as de 3 anos adiante. Mostra unha cuberta e contracuberta con encadernación de cartoné. As ilustracións sobresaen pola súa ampla gama de cores vivas (azul, verde, amarelo, violeta…), así como polo emprego de formas xeométricas. Esta proposta icónica de evocación surrealista recolle a historia de Olaj, un principiño que, farto da soidade, emprende unha viaxe polo seu pequeno planeta. Diversos animais fantásticos de marcado valor simbólico iranlle facendo compañía e conformando un grupo moi diverso: un peixe de cola ao revés, un cabalo alado,un tigre arco da vella, un elefante elegante… Trátase dunha historia iniciática en busca de compañía e amizade que se asenta en estruturas acumulativas que se reiteran e conforman un camiño circular. A todos os animais que atopa Olaj pregúntalles se o acompañan, ata que, ao final, se atopan cun vagalume en plena noite. A este, pola contra, pregúntanlle se os guiaba a todos. Así os que comezaron sendo uns descoñecidos e compañeiros de viaxe terminaron por ser bos amigos.

Potencialidades educativas. É un libro que destaca por utilizar un esquema baseado en contos tradicionais por medio de rimas, xogo de contrarios, diálogo reiterativo, oralidade … pero adaptados aos nosos tempos. Olaj fainos partícipes dunha aventura a través do día e da noite, sobre a amizade e a xenerosidade. Son valores que sempre están presentes e que nunca está de máis traballar nas aulas. Trátase, xa que logo, dunha proposta que non nos deixará indiferente tanto polo seu contido como pola súa estética e orixinalidade das súas imaxes.

Recursos de interese.

O conto relatado:

Etiquetas. Cooperación, solidariedade, amizade, soidade, fantasía, diversidade, xenerosidade, abandono, viaxes, emocións, aventura.

Autoría. Xoubiñas (Sara Vázquez Montes, Cristina Vidal García e Nuria María Serodio Pérez).

domingo, 29 de abril de 2018

Milu

Rivas, Manuel, Milu, ilustr. Aitana Carrasco, traducido por : Xosé Ballesteros, Pontevedra: Editorial: Kalandraka, col.”Maremar”, 2008, idioma galego, 48pp. (ISBN: 078-84-8464-735-5).

Breve descrición do formato e do contido da obra. Este álbum literario narra a historia dunha nena que se atopa nunha situación de desvantaxe social, porque a súa familia ten problemas de alcoholismo e depresión e non se poden facer cargo dela.  Mostra a soidade que sente Milu e a incomprensión da súa situación familiar, a cal a leva a silenciar esta realidade vivida ata que entra en xogo a escola e os servizos sociais para buscar un lugar onde a cativa este ben atendida, onde a rapaza acaba nun centro de acollida. 
Somérxenos no seu mundo imaxinario onde o seu refuxio e apego lle manteñen a esperanza dun cambio na súa vida, mediante a amizade que establece cunha televisión, que mais semella unha man a unha amiga a cal lle axuda a evadirse da súa situación diaria, e suple o amor e cariño que nese momento da súa vida está perdido. A nena tamén nos narra as súas experiencias vividas no centro de acollida ata que a súa familia se recupera e pode volver a facerse cargo da cativa.
Esta obra de discurso lineal preséntase a través dun discurso textual sinxelo, composta pola introdución narrada en terceira persoa, que nos axuda a mergullarnos na historia, o nó onde xorde o conflito do personaxe, e o desenlace onde se resolve o problema plantexado. Este relato  tamén contén algunhas metáforas e algún verso. Ademais mestura a realidade coa ficción, mediante elementos imaxinativos dun mundo no que a cativa se somerxe. Por unha banda, a narración preséntase en terceira persoa e inclúe diálogos dos personaxes en primeira persoa. Existe un narrador heterodiexético que nos introduce na historia, narra o conflito e o pecha. A voz da protagonista expresa os seus e sentimentos, preocupacións e requirimentos. Mentres que a voz dos outros personaxes expresan os seus comportamentos erráticos, as preocupacións e reflicten as situacións difíciles que están a pasar. Por outra banda, o texto está estruturado con frases curtas, pero parágrafos longos que ocupan  case todo espazo das follas as cales non conteñen ilustracións, sempre segue esta mesma estrutura. A letra é de imprenta, en minúscula e conta cun tamaño medio.
Trátase dun libro ilustrado de tapas duras encadernado en cartoné, de forma cadrada. Da ilustradora de “El viaje del bisabuelo” y “Los posos del café”. Este libro foi finalista do 3rd CJ Picture Book Awards 2010. Os debuxos son grandes e polo xeral ocupan toda a folla. As ilustracións son coloristas e mesturan estampados, gravados antigos e texturas, creando ambientes realistas con elementos oníricos. As imaxes son complementarias e acordes ao que se narra. As ilustracións son moi coidadas e conteñen moitos detalles con aspectos que suman e enriquecen a historia que se narra,  amplían información, e mostran a crueza das situacións vividas, os momentos de ensoñación, refuxio, preocupacións, medos e as situacións que vai lle van acontecendo as personaxes da historia. 

Potencialidades educativas. Esta historia serve para tratar o tema da familia en concreto un caso de dificultade social, cun contexto familiar adverso, polo que axuda a abordar esta problemática tanto coa familia coma co alumnado. Podemos tratar a soidade que senten as crianzas nas situacións difíciles e as emocións e sentimentos que lles xeran e que non saben expresar e visibilizar cara os demais. Neste conto faise visible como os problemas dos adultos lle afectan directamente aos cativos e cativas, nos que sempre se ven prexudicados. Tamén podemos traballar as emocións e sentimentos que  causan as situacións que as crianzas non comprenden e que lles son difíciles de afrontar. Este libro e ideal para abordar o tema dos centros de acollida, e comentar o que son, e porque moitos nenos e nenas teñen que irse a vivir alí. Non nos podemos esquecer de ver o lado positivo desta historia que é a importancia da imaxinación e creatividade para sobreelevar e evadirse dos problemas que nos rodean, e a esperanza e superación dos mesmos.Tamén plasma as súas ilusións e a súa idea da felicidade.Temos que destacar que ante unha situación de dificultade deben comunicalo a un adulto para que lle brinde a súa axuda, aínda que teña medo o descoñecido e do que poda pasar nun futuro un tanto incerto.

Grupo conflitos persoais. (Nuria Castiñeira Rodríguez, Sandra Dapena Hortas, Sheila Domínguez Da costa,  Carmen Eiras Conde, Sara Fernández Luna e Silvia Fraguas Juncal ).

lunes, 23 de abril de 2018

Correo para el tigre



Janosch, Correo para el tigre, trad. Eva Almazán, Pontevedra: Editorial Kalandraka, 2011, [52 pp.], (ISBN 978-84-92608-10-2).


Breve descrición do formato e contido. Estamos ante un álbum ilustrado do autor alemán Janosch, editado en galego por Kalandraka no ano 2011. Janosch é o nome artístico de Horst- Ecker, que recibiu importantes premios no ámbito da Literatura Infantil e Xuvenil polo seu labor creativo e está recoñecido como un dos mellores autores-ilustradores do mundo, ademais de dirixirse ao público adulto con propostas cunha marcada compoñente autobiográfica. "Correo para el tigre" diríxese a nenos/as de 3 anos adiante e preséntase nesta edición cunha cuberta e contracuberta con encadernación de cartoné. Consta dunha ampla variedade de cores moi vivas e dunhas tamén rechamantes escenografías planas. Os personaxes aparecen representados como figuras bastante realistas (neste caso, animais humanizados), pero cun toque moi persoal e característico de Janosch nas ilustracións. Nas súas páxinas relátase a historia ambientada nun bosque, no que o personaxe principal, Oso, foi pescar. Tigre pediralle a Oso antes de marchar, que lle escriba porque está ao outro lado do río e séntese moi só e triste cando el marcha. Así Oso levou consigo un bote de tinta, papel e un sobre para escribirlle a Tigre. O problema era que no bosque o correo nunca fora moi fluído. Co enxeño duns e a axuda doutros, este bosque acaba por transformarse no lugar mellor comunicado do mundo. É esta unha historia na que se fala de amizade, soidade, emocións, cooperación, sentimentos... recomendable para que o alumnado máis pequeno valore a importancia de manter vivos os canais de comunicación entre as persoas queridas.

Potencialidades educativas. Por medio dun coidado texto e unha proposta ilustrativa atractiva e cargada de sentimento, Janosch fabula con gran mestría e frescura sobre como os protagonistas desta curiosa e tenra historia inventaron o correo postal, o correo aéreo e o teléfono. Os personaxes expresan as súas emocións con total liberdade, dende a calma e a asertividade. Así móstranlles aos nenos/as a importancia de evidenciar o que se sente e de intentar atopar solucións. Así mesmo, esta fábula de animais moderna fai acenos cara aos contos tradicionais populares.

Recursos de interese.

Videoconto:

https://www.youtube.com/watch?v=8AY6ObthtOs

Etiquetas. Cooperación, amizade, soidade, asertividade, emocións, sentimentos, comunicación, enxeño, inventos, escritura, medios de comunicación.

Autoría: Xoubiñas (Cristina Vidal García, Sara Vázquez Montes e Nuria Mª Serodio Pérez).

viernes, 20 de abril de 2018

Cerca

Colombo, Natalia, Cerca, trad. Manuela Rodríguez, Vigo: Kalandraka, 2008, [36 pp], (ISBN: 84-8464-677-7).

Breve descrición do formato e contido. Este álbum ilustrado, de tamaño 20x20 cm, preséntanos na cuberta os dous personaxes da historia, o señor Pato e o señor Coello sobre un fondo vermello. Ademais inclúe o título con grandes letras e deseños interiores diferentes, e as referencias á autora, editora e premio que mereceu, O Premio Internacinal Compostela para Álbum Ilustrado 2008. O señor Pato e o señor Coello crúzanse sempre que saen da casa, para ir a traballar, no parque, cando van e cando veñen..., pero nunca se saúdan. Isto é unha mágoa, porque poderían ser grandes amigos. Esta é unha historia con final aberto, na que primeiro se presentan os dous protagonistas e, posteriormente, o que adoitan facer día a día. Nas páxinas predominan as ilustracións e o texto verbal aparece grafiado con letras grandes e maiúsculas, o que é moi axeitado para comezar na lectura. As imaxes son un reflexo do que o señor Pato e o señor Coello fan día a día. Sobresaen os xogos coas cores para expresar diferentes emocións, polo que a alegría se representa con cores cálidas e os personaxes felices, mentres que a tristura se recolle con cores escuras e personaxes tristes. Nas últimas páxinas emprégase un fondo escuro sobre o que están os personaxes e só aparece a súa cara, dando máis dramatismo á situación para logo transmitir a desilusión que é que non sexan amigos.

Potencialidades educativas. Esta obra permítenos traballar a cordialidade, saudar cando entramos nun sitio e despedirnos cando saímos. Tamén a soidade, podendo debater se é complicado facer amigos ou non, porque señor Pato e señor Coello non son amigos... A partir de aí poderíase traballar a amizade e a importancia desta. Como se recolle o día a día dos personaxes, tamén se poderían traballar as rutinas e os hábitos. Os protagonistas pasan por distintas zonas, como a veciñanza, o parque, a rúa..., o que nos permite tamén aproximarnos aos distintos lugares dunha cidade.


Recursos de interese.
Contacontos:

Conto animado:


Autoría. Cabaciñas (Laura Domínguez Álvarez, Tania García Pereira, Janira Gil Lago, Noelia Gontad Saavedra e Emma Juncal Paredes).

sábado, 14 de abril de 2018

O meu amigo Álex

Gurrutxaga, Mikel, O meu amigo Álex, ilustr. Maite Gurrutxaga, Pontevedra: Faktoria K de libros, 2010, [ 32 pp.], (ISBN: 978-84-96957-93-0).












Breve descrición do formato e do contido. Neste álbum ilustrado cóntase a historia de Isabel, unha rapaza que vive no campo. A súa vida está chea de soidade ata que coñece un monstro sen fala, Álex. O monstro acompaña a súa amiga no seu día a día, tamén cando ten que mudarse á cidade. Xuntos enfrontan todos os retos que supón esta nova vida. Isabel coñece novos amigos e amigas, pero a medida que a amizade con estes vai crecendo, o monstro Álex vai desaparecendo. A nena sofre esta perda, pero está moi contenta grazas ás súas novas amizades. Álex era un verdadeiro amigo, pero xurdido da imaxinación de Isabel durante a súa solitaria vida no campo.

Esta historia está narrada cunha linguaxe poética e musical. O vocabulario empregado é sinxelo e accesible, o que facilita a comprensión para todos os lectores. O texto está acompañado de ilustracións moi realistas con personaxes visuais e próximas. Unha das principais, o monstro Álex, transmite bondade e dozura a través de formas redondeadas con trazos e cores suaves. Podemos ver tamén estas características das ilustracións na representación da nena Isabel, cunhas meixelas coloradas que denotan tenrura. A imaxe da cuberta é ben diferente das que atopamos no interior deste álbum. En contraposición a elas, na cuberta aparece o monstro Álex representado cun trazo único e sinxelo de cor azul sen recheo ningún, que semella un debuxo sobre o papel.

Potencialidades educativas. Este álbum ilustrado, recomendado para nenos e nenas a partir de seis anos, permítenos traballar numerosos temas. Entre as súas temáticas atopamos a amizade, a través dunha nena chamada Isabel e o seu amigo, un monstro mudo chamado Álex creado pola súa imaxinación. Nesta obra tamén se abarcan os cambios, a protagonista da historia ten que mudarse a unha nova cidade, con todo o que isto comporta, como adaptarse, integrarse e facer novas amizades. Outro dos temas que se tocan en O meu amigo Álex é o da soidade: Isabel vive no campo e séntese soa, polo que da súa imaxinación xorde un amigo que lle fai compañía, xoga con ela e a acompaña ata que xa non se sente soa ao facer un novo círculo de amizades.












Autoría. Cabaciñas (Laura Domínguez Álvarez, Tania García Pereira, Janira Gil Lago, Noelia Gontad Saavedra e Emma Juncal Paredes).