A guerra dos Números

Darién, Juan. A guerra dos Números, Trad. Marisa Núñez, Pontevedra: OQO editora: Colección O, 2009 [53 pp.] (ISBN 978-84-9871-154-7)

Breve descrición do formato e contido. Esta obra literaria preséntase baixo un formato cadrado (25 x 23 cm) con encadernación de tapa dura. Nela recóllese a historia do número UN, que pasaba os seus días sen compañía e amargado polo seu diminuto tamaño, de aí que teña unha grande envexa dos demais. Todo muda nesta historia protagonizada por elementos matemáticos, cando o REY MENOS lle ofreceu os planos para construír un instrumento de gran capacidade destrutiva: o signo MENOS.

Mediante esta recreación ficticia, estase a elaborar unha metáfora coa que se evidencia a equivocación na que están instaladas aquelas persoas desconfíante de todo aquilo que se presenta como diverxente. Pola contra, lánzase unha mensaxe da riqueza que implican a pluralidade e a variedade. A colaxe dixital é a técnica empregada para configurar as ilustracións deste texto de inspiración bélica, no que as imaxes e as fortes cores empregadas evocan, desde unha perspectiva infantil, diferentes escenas e figuras propias de episodios de confrontación. Por último, destacar que esta obra defensora da paz e da liberdade recibiu o premio de ilustración da Fundación Cultural “CJ Picture Book Awards” do 2008.

Potencialidades educativas. Esta historia ofrece un texto extraordinario para tratar os motivos e as consecuencias das guerras, ademais de acoller unha mensaxe de enaltecemento da diferenza e da paz por medio dunha proposta textual e icónica de carácter metafórico. Tamén se pode utilizar como un instrumento didáctico apropiado para introducirse nos códigos matemáticos, fundamentalmente, na operación da resta. Toda esta aprendizaxe conseguirase a través da mediación que supón a linguaxe narrativa na adquisición de conceptos abstractos.

Recursos de interese

Curtametraxe:

https://www.youtube.com/watch?v=il6dkU0XqyY

Autoras: PUMA (Uxía Lojo Pouso, Andrea Martinez Costas, Paula Moares Piñeiro, Alba Nieto da Costa, Montserrat Santibáñez Varela)