El hilo de la vida

Cali, Davide, El hilo de la vida, ilust. Serge Bloch, Barcelona: Editorial Ediciones B., 2006, [34 pp.] (ISBN 9788466661744).

Breve descrición do formato e contido. Nun peculiar formato apaisado e estreito, a cuberta desta obra xa nos presenta o protagonista cando era pequeno sobre un fondo branco que semella ser un sobre no que el se apoia dende o interior. A modo de detalle e para outorgarlle sensación de volume á cuberta, inclúe tamén un cachiño de fío vermello que o protagonista ten entre as mans e un recadro co borde e letras vermellas onde se escribe o título. No interior atopamos ilustracións compostas de finas liñas de cor negro e o fío en vermello, todo sobre un fondo branco sen moitos detalles, só algunha maneira de xogar co papel para dar relevo ou profundidade. O texto distribúese entre a parte superior da páxina e a inferior da seguinte, a través dunha linguaxe doada e concisa, pero atractiva. A voz en primeira persoa dun neno relatános a súa experiencia de vida, que se fixa sobre todo na espera dos momentos máis relevantes. Así agarda que chegue o Nadal, que pare de chover, reencontrarse coa moza, ter un fillo, ter netos, que a súa muller se recupere. Na espera de todo isto, perde a muller e espera que a morte lle chegue tamén a el, aínda que deixa ver un raio de esperanza ao final coa chegada dunha nova vida, a do seu futuro neto.

Potencialidades educativas. É esta unha obra que convida a abordar cuestións vinculadas co ciclo da vida, sempre cargado de alegrías e asaltado por duros e tristes sucesos. Coa exemplificación desta historia quere animarse a superar os malos acontecementos da vida e pensar no positivo, pois, aínda que a morte é un suceso lutuoso, co tempo pode superarse. Tamén permite abordar a empatía, xa que co transcurso da historia o lectorado identifícase co protagonista e as súas vivencias.

Recursos de interese.

Vídeo animado “El hilo de la vida”de Youtube https://www.youtube.com/watch?v=i2Ymk0Vl7ms


Autoría. Grupo Baleiras. (Irina Svetlana Bello González, Alessandra Bispo Portas, Judit Cerviño Malvido, Xiomara Laranxeiro Casás)