Mostrando entradas con la etiqueta Samaín. Mostrar todas las entradas
Mostrando entradas con la etiqueta Samaín. Mostrar todas las entradas

sábado, 28 de abril de 2018

Brinca Vai!

Nogueiras, Paco, Brinca Vai!, ilust. David Pintor, vídeo Jóse Miguel Sagüillo, Kalandraka Editorial, 2014 [56 pp.] (ISBN: 978-84-8464-877-2)


Breve descrición do formato e contido. Esta obra é un libro cadrado de tapa dura de dimensións 16 x 16 cm. É un libro musical –inclúe cd e dvd- que está formado por 12 cancións, unha para cada mes do ano, e que tratan sobre diferentes temáticas (natureza, festas...) En canto ao discurso visual, o libro está disposto de maneira que a canción queda na folla da esquerda e o debuxo na da dereita. As ilustracións son grandes, con cores vivas e  elaboradas, intentando sempre darlle un toque de humor. Por último, a tipografía que utiliza nos títulos das cancións é unha mestura de outras diferentes, mentres que na mesma canción utiliza sempre a mesma.
Potencialidades educativas. A través deste libro musical, podemos achegar aos máis pequenos diferentes festas populares  coma o Samaín, o Antroido ou o magosto dunha forma lúdica e diferente. Isto axudará ao desenvolvemento da entoación e o ritmo da fala, ademais do gusto e o desfrute coa música.

Recursos de interese.
  • http://www.brincavai.com/ 
  • https://www.youtube.com/watch?v=TDwT_igWUZE  

Autoría. Festeiras (Icía Domínguez González, Irene González Ibáñez e Laura Juanatey Martínez)


Corre corre, cabaciña

Mejuto, Eva, Corre corre, cabaciña, ilust. André Letria, Pontevedra: OQO Editora, col. O, 2006 [36 pp.] (ISBN: 978-84-9871-532-3)

Breve descrición do formato e contido. Esta obra é un álbum ilustrado rectangular de tapa dura e dimensións 25 x 23 cm. En canto ao discurso visual, os debuxos son grandes -na meirande parte dos casos ocupan case as dúas follas-, vistosos e están feitos coas cores típicas do outono: o laranxa e o marrón. Son moi expresivos -reflexan dende a felicidade plena e o medo da avoa ata a furia do lobo ou do león- e bastante realistas. Destaca o tamaño e a cor negriña do texto nos momentos que falan os animais –o lobo, león ou oso- e a avoa, intentando que a persoa que o lee modifique o seu ton e lle de profundidade. Por último, os textos son repetitivos e riman entre eles, polo que isto facilitará a súa memorización aos máis pequenos.
Nesta historia a protagonista é a avoa, unha muller maior que recibe a invitación de voda da súa neta. De camiño ao casamento, encóntrase a tres animais que a queren papar: primeiro un lobo, logo un oso e por último o león; e por iso, vese obrigada a convencelos dicíndolle que como vai de convite, á volta estará máis gordiña. Coa súa astucia, será capaz de convencelos e evitar estes obstáculos no seu camiño para chegar a tempo á voda. Á volta da celebración, a avoa meterase nunha cabaza e despistará aos tres animais, chegando sa a súa casa de novo.
Potencialidades educativas. Esta obra porá un toque de humor á situación da avoa, unha muller que deberá sacar o seu enxeño para que os animais non a papen, polo que causará interese nos máis pequenos. Ademais, os trabalinguas, as repeticións e as rimas contribuirán ao desenvolvemento da fala dos máis pequenos, contribuíndo á correcta pronuncia e memorización de pequenos fragmentos. Por último, as emocións tamén teñen unha carga importante ao longo do conto, polo que tamén poden ser obxecto de tratamento.
Dados os elementos que presenta esta obra, pode ser axeitada para tratar na aula de educación infantil con motivo do Samaín.

Recursos de interese. http://www.edu.xunta.gal/centros/ceipperezviondi/node/482

Autoría. Festeiras (Icía Domínguez González, Irene González Ibáñez e Laura Juanatey Martínez)

martes, 10 de abril de 2018

O noso Samaín

Birott Bermejo, Loretta, O noso Samaín, ilust. Nuria Valdeón Balsas, Vigo: Editorial Galaxia, 2016, [28 pp.], (ISBN: 978-84-9865-738-8).

Breve descrición do formato e contido. Trátase dun álbum ilustrado en cartoné de dimensións 29,5x22cm. En canto ao discurso visual, podemos observar imaxes redondeadas e, dentro do fantasioso da historia, realistas. Predominan as cores escuras, xa que case toda a narración se desenvolve de noite, dando así unha maior sensación de tenebrosidade (recordemos que estamos a falar do Samaín), pero tamén atopamos unha gran presenza do laranxa, unha cor cálida. Así, a gama cromática non é moi ampla. En canto ao discurso textual, podemos observar que as letras, en minúscula, presentan sempre o mesmo tamaño, pero cambian de cor segundo o fondo sobre o que se escriban. Isto permite unha mellor lectura, reforzada ademais polo tamaño medio e a forma redondeada que presentan as letras.
O libro presenta unha viaxe pola historia da noite de Samaín, retrocedendo tempo atrás e descubrindo cal é a súa orixe. Pero, antes de comezar dita historia, unha clase de nenos e nenas está no patio á espera de que a súa mestra lles conte as historias desta noite tan especial. Así, comézase narrando a súa orixe celta e como e porque os celtas celebraban esta festividade. Isto dá lugar á narración de lendas sobre fadas e trasnos e sobre espíritos. Tamén se fai referencia ás diferentes tradicións que se tiñan segundo a zona de Galicia e o nome que asignaban aos farois que facían. A historia remata cos nenos desa mesma clase apañando castañas.

Potencialidades educativas. Con este libro podemos achegar aos máis pequenos un fragmento da historia de Galicia dunha maneira amena, ademais de introducilos nas lendas populares e seres mitolóxicos. Tamén nos pode dar pé a tratar as diferentes culturas presentes na Península ao longo da historia e, ademais, a abordar algo tan importante e que moitas veces se ten como tema tabú como é a morte.

Autoría. Festeiras (Icía Domínguez, Irene González e Laura Juanatey)