¡Hombre de color!

Ruillier, J., ¡Hombre de color!, Barcelona: Juventud, 2003 [32 pp.], (ISBN: 978-84-261-3357-1).

Descrición do formato e o contido: Este conto-poema, que parte dun relato da tradición oral africana, preséntase nun volume con tamaño 24x24 cm e de tapas duras. A cuberta e a contracuberta teñen cor amarela cun debuxo dun home con varias colores como figura central. Resaltan as personaxes de tipo esquemático e con cores chamativas que cobran protagonismo. Respecto ao texto, a letra é grande e clara a excepción dos momentos concretos nos que se describen as cores. A historia contada é sinxela e transmite unha notable tenrura que nos fai pensar sobre a diferenza da cor da pel nos humanos. Así mesmo, exponse a idea da existencia de diferentes cores na raza branca en oposición á negra, xa que, segundo a cultura ou situación xeográfica onde se atope a persoa, posuirá un ton de pel determinado. O protagonista deixa ver a variedade de cores que podemos adquirir en múltiples situacións como por exemplo cando tomamos o sol ou mesmo cando enfermamos, formulando a dúbida sobre cal é a raza que verdadeiramente ten máis dunha cor e facendo reflexionar acerca do chamado “home de cor”. No libro represéntase a situación, onde a cor do personaxe de raza branca vai variando en circunstancias adversas, mentres que aquela de raza negra mantense idéntica en todas elas.

Potencialidades educativas: Actualmente, vivimos nunha sociedade global onde convivimos xente de diversos lugares e por iso debemos inculcarlles aos máis pequenos o valor da convivencia e a loita contra a xenofobia. A través deste libro, podemos traballar as diferentes culturas que coexisten no mundo e introducir temas como a igualdade ou o racismo potenciando a idea de apoio á diversidade, sendo conscientes da riqueza que isto supón.

Etiquetas: Interculturalidade, diversidade cultural, multiculturalidade, igualdade.

Autoría: Prímulas (Sonia Álvarez García, Mónica Planet Márquez).