Pontelectura Infantil: A mellor sopa do mundo

miércoles, 2 de mayo de 2018

A mellor sopa do mundo

Isern, Susanna, A mellor sopa do mundo, ilust. Mar Ferrero, trad. Paco Liván, Pontevedra: OQO Editora, col. “O”, 2015. [36 pp.] (ISBN: 978-84-9871-526-2).

Breve descrición do formato e contido. Álbum ilustrado cun formato cadrado (25x23cm) e tapa dura, con encadernación cartoné. Na cuberta preséntanos os personaxes mirando no interior da pota onde se encontra a mellor sopa do mundo. Esta obra cóntanos a historia duns animais do bosque que, sorprendidos pola neve, deciden refuxiarse un a un na cabana da tartaruga. Ela dispoñíase a facer unha sopa e cada vez ían achegándose máis animais á súa cabana. Non viñan coas mans valeiras, cada un traía un ingrediente para a súa sopa. Os animais cooperaron e conseguiron rematar a sopa. Prepararon a mesa, sentaron e todos probaron o rico alimento. Nese intre todos quedaron abraiados ante o sabor daquela sopa, estaba deliciosa! Os animais pensaron que a tartaruga lle metera algún ingrediente especial. Ao rematar a historia todos son coñecedores do verdadeiro segredo da sopa. O texto do relato aparece nun tamaño grande e, dependendo da paxina e do que se narre nela, as palabras aparecen colocadas de diferente forma, o que fai que o conto sexa máis atractivo. Polo xeral, o texto aparece cun fondo branco, de cor negra, sendo así unha letra con moita claridade. Nalgúns fragmentos, aparecen letras cun tamaño maior con respecto ao resto, facendo fincapé nelas. Na mesma banda, os diálogos entre os diferentes animais aparecen en negriña para destacalos. Por outro lado, a ilustradora, tendo en conta o pelo dos animais e a súa roupa, xoga cos lapis de cores para ofrecernos estas imaxes simples pero a vez moi tenras. Ao comezo da historia destaca a cor branca, xa que fora da cabana da tartaruga está producíndose unha gran nevarada. Esta cor estará presente durante toda a obra no fondo das ilustracións. Segundo vai avanzando a historia, chaman a atención as cores das roupas dos animais, polo seu colorido.

Potencialidades educativas. Con este conto podemos amosarlles aos máis pequenos e pequenas as grandes vantaxes da cooperación, xa que os animais axúdanse durante todo o proceso da elaboración da sopa e conseguen que quede deliciosa. A cooperación segue presente, tamén, ao rematar de comer a sopa, cando todos lavan os pratos e forman unha cadea para levalo a cabo. Tamén se amosa a parte máis tenra da amizade e da grande hospitalidade, dous aspectos moi importantes.